PATHIAN RALTHUAM

     PATHIAN RALTHUAM

(Ephesi 6:10-18)

                                                                                                           K. Laldawngliana, Synod Office                                               

Ephesi hi khawpui ropui tak sumdawnna hmunpui ni thin a ni a. A mi chengte pawh an tam thin hle. Sakhaw hrang hrang Biakna heng Grik Pathian nu Artemis te, Roman Pathian nu Diana te, Biakna Temple ropui tak awmna hmun a ni a. He Khawpuiah hian Paula’n Kohhran dinin kum thum lai a enkawl chhunzawma, Kohhran mal a enkawl rei ber pawl a ni hial awm e. Ephesi Kohhran hi Kohhran nung tak, thawkrim, chhel leh mi sual ngai theilo tak an ni thin a, Lal Isua avang a tuarna pawh tam tak paltlang tawh an ni a, mahse Hmangaih Johana chuan demna a neih thu kan hmu a, chu chu ‘I hmangaihna hmasa ber kha I ban tak avangin’ tiin demna a neih thu kan hmu a ni. (Thupuan 2:1-7)

           

      Ephesi Kohhran tana Tirhkoh Paula chuan Jail-a tan laiin lehkha thawnin Kohhran hote fimkhurna tur a hrilh a, chungte chu taksa tiduhdah leh nek chepna leh duh lohna lam ni lovin, tisa leh thisen ni lo, Lalnate leh, thuneihnate leh he thim chunga khawvel roreltute leh, van hmunahte thlarau sual ho awm te an nih thu kan hmu a, chu chu hetiang hian han sawi ila- Diabola ngamthlemna kan do turte chu- Lal duhnate, duhamnate, chaponate, itsikna leh mahni inhmangaihna, lansarh duhnate leh pawn lam lanmawi duhna tiang te in sawi ila hriat thiam a nuam awm e. Heng lakah hian kan fimkhur theih nan Pathian Ralthuam famkima inthuam turin min chah a ni.

      Sipaite chuan ral an beih dawnin Ralthuam famkim nen a inthuamin, hmelmate bei turin an inralring thin a ni. Davida ngei pawh kha Goliatha bei tura a inbuatsaih chuan Saula Ralthuam a inbel a nih kha (I Samuela 17:38). Hmanlai Rom hun lai chuan an ralthuam inbel thinte chu Thir Lukhum, Awmphaw, Kawnghren, Pheikhawk, Phaw leh Ngunhnamte a nitlangpui thin.  He khawvelah hian Krista Sipaite kan ni a, Pathian ralthuam a kan inthuam a va tul tak em. Pathian Ralthuam chu eng nge ni ang le? Paula chuan Ephesi Kohhrante hnen ah Pathian ralthuamfamkim a tihte chu – Kawnghren atan Thutak, Awmphaw atan Felna, Pheikhawk atan – Remna ChanchinTha, Phaw atan Rinna, Lukhum atan-Chhandamna, Ngunhnam atan- Pathian Thu hmang turin a ti a ni. Hetiang hian han sawi ila- Pathian thu leh Tawngtaina hi kan tan Pathian Ralthuam leh kan phaw nghet tur a ni ti ila kan sawi sual awm lo ve.

                       

      Lal Isua ngei pawh in Diabola thlemna a tawh lai leh harsatna a tawh laiin a phaw atan Pathian thu a hmang thin a nih kha. Kan ring tu nunah hian Pathian thu leh Tawngtaina hi hunbi neiin nitin kan ralthuam atan inbel ila, chhun leh zanah hlipthla lovin nitina kan silhfen atan hmang ila. Thlarau rah chi hrang hrang hi kan nunah a lo thleng ngei ang (Galatia 5:22). Tichuan miten kan nunah ChanchinTha an lo hmu ngei ang. He Kumthar lo thleng turah hian kan mimal nun theuh inbuatsaih ila. Pathian thu chhiar leh Tawngtaina hun hman tam kum atan puang thei ila, kan mimal nun, Kohhran leh Ramin hma a sawn ngei ang. Pathian Ralthuam famkim nena inbel hi Ringtu nun atan kan hmelma beihna leh Diabola laka kan himna bulpui ber a ni.

      Nakinah khua a var hunin, Ka Chhandamtu chu ka hmu ang; Chutah Ralthuam ka dah tawh ang, Aw, puanvar ropui mi sin tir ang.